ʼn Dankie van jou bestuurder? Wat is dit of weet jy hoe dit voel?

KURSUSSTATUS:

Deur Paulize Mahon

Met 15 jaar se werksondervinding het ʼn mens al baie te doen gehad met verskillende mense, verskillende kollegas en verskillende bestuurders.  In my hele loopbaan was ek nog net geseën met goeie bestuurders, en by elkeen het ek iets geleer. Elke bestuurder en selfs kollegas het as mentors gedien vir ʼn spesifieke tyd tot ek bevorder is of totdat my bestuurder bevorder is.

So praat ek met my vriende oor hoe gelukkig ek is in my werk, en watter goeie leierskap ons by die Solidariteit Beweging het, en dan begin ʼn mens hoor dat almal nie so gelukkig is in hulle werk nie.  Ek hoor by vriende hoe hulle bestuurders op die personeel skreeu en hulle verkleineer en nie reg behandel nie, en ek besef ek ken dit nie.  Ek weet nie wat dit is dat my bestuurder by die werk op my skreeu of my verkleineer nie.

So kom ek agter dit is ʼn algemene gevoel van werknemers dat hulle oorwerk is, en dat jy soveel ekstra insit maar niks terugkry behalwe jou salaris nie.  Mense is vinnig om te sê die dankie wat jy kry is jou salaris, maar het ons al ooit gesit en wonder watter groot verskil die woorde “dankie vir jou harde werk” maak?  Wat gebeur as jy wel vir jou werknemers of personeel dankie sê as jy sien daar word ekstra hard gewerk of moeite gedoen?  En hoe voel jy as werknemer as daar vir jou dankie gesê word vir die ekstra moeite wat jy ingesit het?

Ek dink terug aan ʼn week gelede toe my bestuurder vir my ʼn e-pos gestuur en versoek het om in die daaropvolgende week met my ʼn individuele gesprek te voer en dat ons dit so gou as moontlik moet afhandel.  Ek dink toe dadelik daar is moeilikheid, want in die pandemie wat ons vandag belewe hoor ʼn mens net van dinge soos “jammer, ons kan jou nie meer bekostig nie, so ons moet jou laat gaan”, of ʼn mens hoor van salarisse wat gesny word, of ʼn mens is dadelik op jou hoede en verwag die ergste.  Ek vra toe nog so ewe of ons maar liewer dieselfde dag die gesprek kan voer sodat ek enige slegte nuus wat ek mag kry dadelik agter die rug kan kry en dit kan begin verwerk, anders gaan ek in elk geval net wakker lê en my oor die slegste moontlike scenario’s bekommer.  So het ons toe die gesprek en hy wou toe net vir my dankie sê vir die laaste paar maande se toewyding en harde werk, en ek wag heeltyd vir die “maar”…  Daar kom egter nie ʼn “maar” nie, en ek besef toe dit is regtig net ʼn gesprek om dankie te sê en terugvoering te gee, en ʼn mens voel sommer dadelik goed.  Na die gesprek het ek sommer nuwe energie om groot take aan te pak en vandag ekstra baie moeite in te sit, want dit is nie net ʼn salaris wat ek aan die einde van die maand kry nie, maar ook erkenning en in ʼn mate respek.

So wonder ek of bestuurders besef wat so ʼn “dankie-sê-gesprek” regtig vir die personeel beteken, en watter positiewe invloed dit op jou gesindheid teenoor jou werk het en ook teenoor die bestuurder aan wie jy rapporteer. Ek onthou toe ek nog studeer het, hoeveel keer ek oor interne en eksterne motivering geleer het, en ek wonder toe hoeveel bestuurders vir hulle personeel dankie sê as hulle sien daar is ekstra moeite ingesit, of as ʼn goeie stuk werk gelewer is.

Om ʼn goeie leier te wees beteken nie altyd jy moet al die antwoorde hê en presies elke minuut van die dag weet wat volgende gaan gebeur nie. Dit begin by die klein dingetjies – ʼn  dankie kan baie ver gaan om personeel se produktiwiteit, motivering en werkstevredenheid te bevorder.

Dus, vir elke persoon wat dit vandag nodig het, dankie vir jou harde werk wat jy doen om die land met ekonomiese groei te help. Ongeag of jy vloere was en of jy ʼn maatskappy bestuur, jy is so belangrik in jou werk wat jy doen, en jy maak ʼn groot verskil om ʼn sukkelende land te help!

Die gevolge van stres weens die Covid-19-pandemie

KURSUSSTATUS:

Deur Paulize Mahon

Ek sit op 21 Maart 2020 op Uvongo se strand vir ʼn kort wegbreek saam met my peetkinders. Die koronavirus is vir ons nog ʼn onbekende en onwerklike faktor. Nog net ʼn handjievol mense in Suid-Afrika het dit, maar ons word reeds vertel dat ons nie op die strande mag wees of mag swem nie, want korona is hier. Dis ʼn vreemde konsep en jy probeer vir ʼn amper 6-jarige en 8-jarige op ʼn seevakansie verduidelik dat ons nou nie meer op die strand mag wees nie omdat ons kan siek raak van ʼn siekte wat nuut is en waarvan ons nie veel weet nie. Nietemin het ons die beste van ʼn baie vreemde ervaring gemaak en dit geniet. Ons maak grappies oor maskers dra en dit is ʼn vreemde konsep elke keer as ons by Spar kom en ons hande met handreiniger moet was voor ons in die winkel mag ingaan.

Maandagoggend 23 Maart ry ons vroeg terug Pretoria toe om in ons eie huis na die president se aankondiging te kan luister. Ons bespiegel oor wat gaan gebeur en wat die president gaan sê. In dié tyd het ons al baie gehoor van lande wat inperkings instel en dat ons fisieke afstand tussen mekaar moet handhaaf, maar dis nogal ʼn vreemde konsep as ʼn mens grootgeword het met die gewoonte om jou familie te druk en te soen – min wetend wat in die volgende paar maande op ons wag.

Ons almal is vasgenael voor die TV en almal snak na hulle asem toe ons hoor ons moet “lockdown”. Ons almal het dit verwag, maar tog gehoop dis nie in daardie stadium nodig nie, want ons het bly dink dit is nie so erg nie. Vinnig begin grappies op sosiale media rondgaan – mense is ingenome om by die huis te bly en hulle deel te doen.

Vinnig moet ons reëlings tref, want drie weke kan lank raak as jou werk staan, so almal maak spoedig planne om van die huis af te werk en seker te maak jy is nou gereed om vir drie weke by die huis te bly en glad nie uit te gaan nie, tensy dit vir dringende behoeftes is soos kos in die huis. Ons is mos egter baie veerkragtig … so raak drie weke van by die huis bly net effens langer met nog aankondigings. Mense begin bekommerd raak oor die ekonomie en dat die inperking nou effens te lank raak. Die reëls maak vir die meeste mense geen sin nie; trouens, dit maak hulle eintlik net vies … en so raak dit al hoe moeiliker en al hoe langer. Mense begin video’s maak oor hoe hulle iemand sal klap vir ʼn goeie pakkie sigarette; mense begin agterkom hoe lekker dit was om net gou in jou kar te kon klim en haarkapper toe te gaan of net gou sommer winkels toe gaan en ʼn geskenk te gaan soek vir iemand wat verjaar.

Dan kom die nuus dat net sekere ekonomiese aktiwiteite mag oopmaak. Almal wonder hoe die nuwe normaal gaan werk, en almal wonder nou ewe skielik onder watter vlakke hulle val en wanneer hulle weer kan begin ingaan werk toe. Jy begin ook wonder oor die woord “essential workers” of noodsaaklike werkers, en mense word versoek om sover moontlik van die huis af te werk. Intussen werk jy baie hard van die huis af en wonder hoe ander mense al die verandering hanteer. As ʼn mens sê verandering is so goed soos ʼn vakansie, is dit nie juis die tipe verandering wat ons in gedagte gehad het nie.

Kort daarna ontvang jy ʼn oproep van ʼn vriendin. Sy kry daardie maand geen salaris nie aangesien haar werk van so ʼn aard is dat hulle net by die werk hulle werk kan doen, en ʼn mens het ook nie ʼn idee wanneer dinge na normaal gaan terugkeer nie.

ʼn Mens wonder of jy nou vir die volgende week of die volgende maand moet stres, en of jy jou moet begin regmaak vir meer maande? Vinnig begin jy aan moontlike oplossings vir die probleem dink en jy begin kyk waar jy kan uithelp met ’n paar basiese goed. So hoor jy van nog ʼn vriend met wie se familie dit nie goed gaan nie … en ʼn mens begin die woorde “too close to home” gebruik, want sulke goed gebeur mos net met ander mense – met iemand se oupa se broer se sussie kind. Jy is nie eens seker wat die persoon se naam is nie, maar jy ken sy storie want almal ken mos altyd iemand verlangs. Maar nou begin jy die mense wat deur ʼn baie moeilike tyd gaan, persoonlik ken.

So begin dit met een vriendin, wat dan oorspoel na nog een toe. Jy begin agterkom hierdie gebeure raak nie meer net ander mense van wie jy altyd net hoor nie; dit is nou iemand met wie jy onlangs, in Januarie, gesels het en aan wie jy heel dapper jou drome vir 2020 vertel het, en julle het vir mekaar vertel hoe mooi die jaar 2020 ons almal gaan behandel en dit gaan net positief en lekker wees.

Die oproepe raak meer; die nood en druk raak groter. Die volgende oproep wat jy kry, is van iemand wat afgelê is by die werk, want daar is nie meer geld om salarisse te betaal of die besigheid se deure oop te hou nie. Jou eerste gedagte is, maar dit kan mos nie wees nie? ʼn Mens probeer moed inpraat en raad gee, en ek besef self dat ek nie ʼn idee het wat my regte tydens afleggings is nie. Wat moet gedoen word, wat is die komplikasies, waar begin jy? Waar baklei jy en wanneer is jy dankbaar vir wat jy kry … Hoe moet ek dit nou weet? Dit gebeur mos net met ander mense, nooit met jouself of iemand wat jy persoonlik ken nie.

Plotseling besef jy dat hierdie realiteit erger is as waarvoor jy ooit gedink het jy in jou leeftyd sal moet voorberei. ʼn Mens lees altyd van pandemies in die geskiedenis en kyk dokumentêre programme en gesels daaroor met jou vriende en hoe erg dit moes gewees het, en hier sit jy en jy besef dat jy nou deel van die geskiedenis raak. Gaan jy eendag as jy oud is vir jou kleinkinders hiervan kan vertel soos ons oumas en oupas vir ons van die Boereoorlog vertel het? Vir die eerste keer begin ʼn mens besef hoe belangrik veerkragtigheid in ʼn mens se lewe is, en hoe dit jou help om veerkragtig te wees en wat dit eintlik vir jou beteken om jou geloof te hê. En ʼn mens wonder wat jy kan doen om ʼn verskil in jou eie lewe te maak. Indien jy ook voel dat jy ʼn leek op soveel gebiede is, wil ek vandag vir jou sê jy is nie alleen nie, maar daar is wel ʼn oplossing.

S-leer het fantastiese programme wat jou deur hierdie onsekere tye kan help. Dit sal jou tot voordeel strek om in hierdie tyd op persoonlike ontwikkeling te fokus. Kyk die gratis webinare oor veerkragtigheid, verlieshantering, stresbestuur, en vele meer. Daar is selfs ʼn volledige e-leerkursus wat handel oor die hele Covid-19-situasie, van hoe om ʼn pasiënt wat positief getoets het, by die huis te versorg, tot wat jy in ʼn afleggingsproses moet en kan verwag, of selfs net hoe om die huidige stresvolle situasie te hanteer. Hoor van kenners op die gebied, van sielkundiges tot arbeidspesialiste.

Bemagtig jouself sodat jy, indien jy in ʼn bootjie beland waar jy dringend werk moet soek, in jou onderhoud kan bewys dat jy jou deel gedoen het om jouself deur voortgesette leer en te bevorder.

Besoek www.s-leer.co.za en volg enige kursus om ʼn nuwe vaardigheid te leer.

 

Sosiale media: Die goud van ons tyd

KURSUSSTATUS:

Deur: Dr. Van den Heever

Tydens die gruwelike inperkingsperiode is ek genoop om agter slot en grendel met my vrou, 10-jarige dogtertjie, 8-jarige seuntjie en 4-jarige woelwater dogtertjie deur te bring. Ek het niks om oor te kla nie; ons is almal lief vir mekaar. Die eerste paar weke het almal op sosiale media vertel hoe oulik almal saam kos maak, bordspeletjies speel, legkaart bou, oefen en tuinmaak. Ons het dit ook probeer. Let wel, probeer. Soms het dit gewerk as daar dalk ’n vergunninkie ter sprake was, maar soms glad nie.

Ek het per toeval voor die inperking my selfoonkontrak opgradeer en het vir ’n skamele R100 ekstra 3 fone bygekry. Ek het gedink dit is dalk ’n slim plan om die kinders opvoedkundig te help met fone.  Daar is mos oulike goed vir kinders aanlyn. Week “duisend” van die inperking het aangebreek en ons hare staan woes, ons huiswerk raak agter, die gemoedere loop hoog, maar my kinders is eksperts met Minecraft en het selfs PubG bemeester. Ek voel soos ’n slegte pa, maar mens het hulle soms laat begaan. Dankie tog vir YouTube Kids, want daar kan hulle soms ook vermakerige en opvoedkundige dingetjies kyk so tussen die gedwonge skool- en huiswerk deur.

Ewe skielik praat my seuntjie van mense asof ek hulle moet ken. “Pa moet sien, Prestonplayz, né…”  “Pa moet sien wat doen Unspeakable” en “Brianaplayz het vir PrestonPlays gedare.”  Ek is stomgeslaan en vra hom wie die mense is, en dan antwoord hy baie selfvoldaan: “YouTubers.”

Mense, dit is beroepe wat ons nie geweet het kan bestaan nie. Sis v Bro is ’n boetie en sussie op YouTube Kids. Hulle het nou die dag ’n video gemaak van hoe jy maklik ’n winkel in jou huis kan opstel. Dié video is 8,2 miljoen keer gekyk. Hulle het voorheen mense op ’n toer deur hulle huis gevat en dít het oor die 7 miljoen kyke gekry. Die advertensiemaatskappye betaal baie geld om op sulke platforms te adverteer.

“85% van poste wat in 2030 beklee gaan word, is nog nie ontdek nie.” 

Ek beheer my kinders se skermtyd, maar as hulle kans kry dan kyk hulle na die “YouTubers” tot hulle grootste genot.  En daar lê goud daarin as jou kind sê dat hy daarvan sal hou om eendag ’n “YouTuber” te wees. Ek hoor al mense wat afgaan en sê dit is nonsens. Binne hierdie nuwe realiteit van sosiale media en die vierde nywerheidsrewolusie word ’n generasie gebore en getoë om anders te dink en anders om te gaan met die wêreld. Ek sê nie ons moet hulle neuse daarin druk en hulle weghou van modderkoekies en karretjies speel nie, maar moet nooit hulle generasie se toekoms onderskat nie.

Eendag as die een kind ’n “YouTuber” is en jou kind kan modderkoekies bak, dan gesels ons weer.  Terloops, my kinders doen beide sodat ons ’n gesonde balans handhaaf, en dan geniet hulle ook die beste van beide wêrelde.

Ons moet die krag van sosiale media in die vierde nywerheidsrewolusie nie onderskat nie. Dit het tydens die inperking mense nader aanmekaar gebring, dit het verbruikers by produsente gebring, dit het kinders tot onderrig gebring, dit het werknemers by ’n ander werknemer uitgebring. En dit gaan nie in die toekoms baie gou verander nie.

Gaan voort in die wêreld my kinders. Gaan bemeester die tegnologie met ’n gesonde balans, want as pappa jou terughou, gaan die wêreld van werk dalk nie weer sy deure vir jou oopmaak nie.

 

Dissiplinêre verhoor: Wat nou?

KURSUSSTATUS:

Deur Mynie Kriek

Dis net nog ʼn gewone werksdag. Dis vroegoggend en jy daag by die werk op. Nadat jy jou rekenaar aangeskakel het, stap jy kombuis toe om vir jou ʼn koppie koffie te maak terwyl jy met jou kollegas gesels. ʼn Rukkie later sit jy in jou kantoor en werk deur jou onlangse e-posse. Jou bestuurder verskyn in die deur en vra of hy met jou kan praat – en jy word yskoud. Dit is ongewoon, en met die opgevoude dokument wat jy in sy hand sien, verwag jy die ergste. Dis immers nie verhogingstyd nie!

Terwyl jou bestuurder die dokument aan jou oorhandig, lig hy jou in dat ʼn dissiplinêre verhoor teen jou gaan plaasvind. Die dokument in sy hand is ʼn kennisgewing van ʼn dissiplinêre verhoor en dit vind twee dae later plaas. Hy verduidelik dat jy geskors is (met betaling natuurlik!) tot die dissiplinêre verhoor afgehandel en daar ʼn beslissing is, maar dat jy darem die geleentheid het om te verduidelik hoekom jy nie geskors moet word nie.

Wat nou? Hoe verduidelik ʼn mens in die eerste plek hoekom jy nie geskors moet word nie, en as jy oor daardie hekkie gekom het, moet jy boonop jouself nog in ʼn dissiplinêre verhoor verdedig.

In jou agterkop dink jy aan Boston Legal. Dalk is daar ʼn argument wat jy daaruit kan haal wat sommer die hele dissiplinêre verhoor sal stopsit …

Min mense verstaan hoe ʼn dissiplinêre verhoor moet verloop, wat die werkgewer se regte in so ʼn verhoor is én wat die regte van die aangeklaagde werknemer is. As ʼn werkgewer moet jy verseker dat die proses billik verloop. Onkunde hieroor kan jou duur te staan kom. As ʼn werknemer is dit jou geleentheid om op die klagte teen jou te antwoord. As jy dit nie reg doen nie, is die gevolge ernstig – afhangend van waarvan jy aangekla word, kan jy moontlik jou werk verloor en boonop sit met ʼn klad op jou naam.

S-leer bied ʼn kursus oor dissiplinêre verhore aan. Die kursus gaan ʼn kombinasie van webinaarfasilitering en e-leer wees. Die kursus gaan in diepte ingaan op dissiplinêre verhore en die volgende aspekte gaan hanteer word:

  1. Die toepaslike wetgewing
  2. Die vereistes vir ʼn billike proses
  3. Hoe om te bepaal of ʼn reël of ʼn standaard verontagsaam is (in die geval van verhore wat met wangedrag te make het)
  4. Die reg op verteenwoordiging
  5. Skorsing voor ʼn dissiplinêre verhoor
  6. Voorbereiding vir ʼn dissiplinêre verhoor
  7. Hoe om aansoek te doen vir uitstel van die verhoor of verteenwoordiging in die verhoor
  8. Die algemene proses wat in ʼn dissiplinêre verhoor gevolg word
  9. Die aanbied van getuienis
  10. Die bewyslas
  11. Hoe teenstrydige getuienis benader moet word
  12. Die gevolge van versuim om vir ʼn dissiplinêre verhoor op te daag
  13. Moontlike uitkomste
  14. Dissiplinêre verhore in ʼn Covid-19-wêreld – die gebruik van tegnologie

Deelnemers moet seker maak hulle het ʼn profiel by S-leer geskep, waarna hulle die kursus (Die Aflegging prosedure in terme van die Arbeidsverhoudingwet) moet aankoop.

Die kursus gaan soos volg aangebied word:

Nadat deelnemers by Die Aflegging prosedure in terme van die Arbeidsverhoudingwet geregistreer het, gaan hulle toegang kry tot die e-leer-kursus, Dissiplinêre verhore – ʼn oorlewingsgids. Deelnemers gaan hierna twee (2) skakels na ʼn GoToWebinar-webinaar soos volg ontvang:

ʼn Verwelkomingswebinaar word op 28 Julie 2020 van 12:00 tot 13:00 gehou waartydens die fasiliteerder haarself gaan bekend stel en gaan verduidelik hoe die kursus aangebied gaan word.

Van 28 Julie tot 4 Augustus 2020 gaan die deelnemers die e-leer-kursus in hul eie tyd voltooi. Indien deelnemers enige spesifieke vrae het, het hulle die geleentheid om die vrae voor die einde van die werksdag op 3 Augustus 2020 aan te stuur.

ʼn Fasiliteringswebinaar vind van 10:00 tot 13:00 op 4 Augustus 2020 plaas. Die fasiliteerder gaan dan die kursusinhoud aanbied – met ʼn fokus op knelpunte en spesifieke kwessies waaroor deelnemers vrae ingestuur het. Tydens hierdie webinaar gaan deelnemers die geleentheid kry om vrae te vra of om insette oor die tema te lewer.

Die kursus beloof om insiggewend en interaktief te wees.

Help! Ek wil groei in ʼn leierskaprol, wat moet ek doen?

KURSUSSTATUS:

Deur Paulize Mahon

Persoonlike groei is altyd belangrik, veral as ʼn mens ʼn leierskaprol wil vervul. Leierskap beteken nie altyd dat jy die hoof van ʼn afdeling of maatskappy moet wees nie; jy kan ook as ʼn individue leierseienskappe hê.  Ongeag of dit vir persoonlike groei of professionele groei is, groei is altyd belangrik en waardevol!

As ʼn mens nie groei nie, stagneer jy vinnig, dus is konstante groei belangrik. Daar is ʼn klomp verskillende maniere om seker te maak jy groei as persoon en in jou professionele hoedanigheid. Die beloning vir groei lê nie in wat ons terugkry nie, maar in wat ons word as ons groei.

Vandag gaan ons kyk waarna ons moet oplet en waarop ons moet fokus om in ʼn leierskaprol te groei.

  1. Maak seker dat jy ʼn verskeidenheid van vaardighede ontwikkel
    Om die beste leier te wees wat jy kan wees, moet jy voortdurend seker maak dat jy nuwe vaardighede ontwikkel. Die dae toe jy gedink het jy het alles onder die knie is in die verlede. ʼn Paar dinge wat nodig is om ʼn goeie leier te wees, is of jy strategies kan dink en vooruit kan beplan – dit is een van die belangrikste aspekte in ʼn leierskapsrol. Daarby moet jy goed kan luister, en nie net luister om ʼn antwoord te kan gee nie, maar luister om te verstaan.

    Stel jy ook belang in die uitdagings wat jou span ervaar? As leier moet jy kan help om jou span te lei wanneer hulle met uitdagings te kampe het, dus is dit belangrik dat jy altyd sal belangstel in die uitdagings en dan help om dit uit te sorteer.  Maak ook seker dat jy krediet gee aan die persoon wat dit verdien; sukses kom nooit net van een persoon af nie, maar van ʼn volle span, en krediet moet aan die individue gegee word wat dit verdien. Kan jy kritiek hanteer?  Om ʼn goeie leier te wees beteken dat jy slegte terugvoering ook moet kan aanvaar daaruit leer.

  2. Skoolgeld is duur – maak dus seker jy leer uit jou vorige ervarings
    Ons almal het al die sêding gebruik, “skoolgeld is duur”. Maar kan ons almal regtig sê dat ons wel iets waardevol of ʼn nuwe vaardigheid geleer het uit foute wat ons gemaak het? Dit is dus uiters belangrik om in moeilike omstandighede te kyk wat ʼn mens kan leer en watter geleenthede uit die moeilike tyd kan voorspruit, in plaas daarvan om net in die probleem vas te kyk. Daar is ʼn moontlike oplossing vir elke probleem.
  3. Daag jou gemaksone uit
    Dit is baie maklik om in ʼn gemaksone te verval en altyd te doen waaraan jy gewoond is, en nie ander of nuwe maniere te probeer nie. Die kanse vir groei in ʼn gemaksone is egter skraal. Raak gewoond daaraan om ongemaklik te wees, want dit is hoe ʼn mens groei. Daag jouself uit om nuwe goed te probeer en nuwe prosesse in plek te stel. 

  4. Fokus op die toekoms, dag vir dag
    Maak seker dat jy nie in die verlede vashaak nie en meer op die toekoms fokus.  As ʼn mens in die verlede vashaak, gaan jy nie die geleenthede kan raaksien wat oor jou pad kom nie. Groeiende leiers weet dat vandag se fondasie goeie groei bied vir die toekoms.
  5. Stel hoë verwagtinge
    Leiers wat groei weet om nie net tevrede te wees met die status quo nie, maar om altyd te verbeter en hoë verwagtinge te stel sodat jy nie middelmatigheid nastrewe nie, maar uitnemendheid.
  6. Kyk na jouself en doen selfondersoek
    ʼn Mens is dikwels op eksterne faktore gefokus, maar wanneer jy as ʼn leier groei, besef jy dat leierskap ʼn groot interne fokus het. Om ekstern te kan lei moet jy intern aan jouself kan werk – jy moet baie selfondersoek doen en verbetering by jouself teweegbring, en altyd besig wees om jouself te verryk en te laat groei.
  7. Vra altyd vrae
    Groeiende leiers vra altyd vrae. Baie mense dink dat leiers reeds alles weet, maar dit is nie korrek nie. Leiers leer elke dag omdat hulle aanhou vrae stel en bly belangstel in verskeie areas. As ʼn mens ophou vrae stel, hou ʼn mens op groei en leer.
  8. Benut jou swakhede
    Ons is geneig om net op ons sterkpunte te fokus, maar om ʼn goeie leier te wees en seker te maak jy ontwikkel leierskapvaardighede moet jy kan klem lê op jou swakhede en dit benut en versterk. As jy net op jou sterkpunte gaan fokus, gaan jy nooit groei nie.
  9. Aanvaar mislukkings
    Wanneer jy ʼn projek aanpak en dit werk nie so suksesvol uit soos jy beplan het nie, is dit belangrik om dit te aanvaar en nie te veel daaroor te tob nie. Dit is egter belangrik om vas te stel waarom dit ʼn mislukking was en daaruit te leer vir die volgende probeerslag, en weer uit jou foute te leer.
  10. Werk met ʼn mentor
    Dit is altyd ʼn goeie idee om ʼn mentor te hê wat jou leiding en ook goeie advies kan gee. ʼn Mentor kan jou help om die beste weergawe van jouself te word, en jou help om gefokus en gegrond te bly in moeilike tye. ʼn Mentor kan jou ook help om jou doel en doelwitte makliker te bereik. Dit sal jou as individue help om vinniger uit jou mislukkings sowel as jou suksesse te leer.

 

Nadat ons gesien het hoe belangrik dit is om altyd te leer en aanhoudend te probeer groei en nuwe vaardighede aan te leer, kan jy op www.s-leer.co.za gaan kyk na leierskapontwikkelingsprogramme wat jy kan volg. Daar is e-leer-kursusse sowel as webinare waarna jy kan kyk om nuwe vaardighede aan te leer.

Bronnelys:

https://www.lollydaskal.com/leadership/how-to-grow-as-a-leader/

https://www.aha.io/blog/grow-into-a-leadership-role

https://www.ccl.org/multimedia/podcast/how-to-grow-as-a-leader/

Werk-lewe-balans: Is dit ’n onmoontlike taak as jy van die huis af werk?

KURSUSSTATUS:

Deur Paulize Mahon

Mense sal die jaar 2020 nie maklik vergeet nie.  Die dae van werk toe gaan terwyl jy bietjie olik is, is verby, en ons moet noodgedwonge van die huis af werk en na alternatiewe maniere te soek om dinge te doen as waaraan ons gewoond was.

Sommige mense is reeds weer terug by die werk, waar ander mense nie weet wanneer hulle teruggaan kantoor toe nie, indien hulle wel teruggaan kantoor toe.

Daar word gereeld gepraat oor werk-lewe-balans, en baie mense se definisie daarvan verskil, maar hoe pas ʼn mens dit toe wanneer jy van die huis af werk?  Hier volg 11 wenke om seker te maak jy behou steeds jou werk-lewe-balans as jy van die huis af werk.

  1. Rig vir jou ’n werkstasie in by die huis
    Maak seker dat jy ’n toegewyde spasie in jou huis het waar jy kan werk, en maak ook seker dat jou werkstasie en jou lewensmaat of huismaat se spasie ook ingerig is sodat almal gemaklik en gerieflik van die huis af kan werk sonder dat enigiets jul aandag aflei of steur.  Ons almal weet teen dié tyd, om van die huis af te werk is baie rustiger en meer ontspanne as om by die kantoor te werk, dus is dit baie belangrik om seker te maak dat ʼn mens steeds professioneel optree, veral tydens videovergaderings of videokonferensie-oproepe.Om ’n gerieflike werkstasie in jou huis te skep, sal ook help om by ʼn gesonde roetine te bly.  Ons almal het daarvan gedroom om eendag in die winter in die bed te sit en werk, maar dit is juis nou belangrik om ’n gesonde roetine te behou. Dus moet jy na jou werkstasie toe gaan wanneer dit tyd is om te werk, en weer die werkstasie verlaat as jy ’n blaaskans neem.
  2. Stel vir jou ’n gestruktureerde werkskedule op
    Ons is daaraan gewoond om 08:00 dadelik te begin werk en dan tussenin ʼn paar blaaskanse te neem wanneer jy vir jou ʼn koppie tee of koffie maak en wanneer ʼn mens jou middagete eet, of dit by jou tafel is en of jy gewoonlik uitgegaan het om buite vars lug te kry by die kafeteria.  Jy het tussen vergaderings en rekenaarwerk ʼn roetine by die werk gehandhaaf. Dit is baie maklik om jou persepsie van tyd te verloor as jy van die huis af werk, en party mense kan baie langer ure werk as wat hulle gewoonlik by die kantoor sou doen, en ander mense sukkel weer om van 08:00 tot 17:00 gefokus te bly.  Probeer om nie net enige tyd van die dag te werk net omdat jy kan nie, maar werk volgens ʼn skedule wat jy opgestel het wat jou dag in nege ure indeel.  Dit sal die kinders ook help om te verstaan dat jy sekere tye in ʼn werk-modus is, en wanneer jy dan nie besig is met jou werkskedule nie, is jy in ouerskap-modus.  Die ideaal is dat die kinders aan hulle skoolwerk aandag gee terwyl jy besig is om aan jou werk aandag te gee.Dit is nou uiters belangrik dat jy vir jou ’n daaglikse werkskedule opstel wat jy gaan volg om seker te maak dat daar minimale ontwrigting en afleidings is wat jou aandag gaan aftrek van jou take wat jy vir jou werk moet verrig.
  3.  Stel ʼn doen-lysie op sodat jou dag produktief begin
    As jy reeds vir jou ’n werkbare skedule opgestel het van hoe jy jou dag gaan aanpak, kan jy aan die einde van elke dag vir jou ʼn doen-lysie opstel vir die volgende dag se take waarop jy moet fokus.  Om fisies jou doen-lysie af te merk soos wat jy take voltooi, kan ’n merkwaardige impak hê en dit kan verblydend wees om te sien dat jy wel doen wat jy moet doen. Veral as jy begin wonder of jy tans regtig produktief is, is ’n doen-lysie van kardinale belang om seker te maak jy bly ook gemotiveerd deur take af te handel.
  4. Begin jou dag reg
    Probeer sover as moontlik om soggens by jou normale roetine te hou. Staan byvoorbeeld op en gaan stort, trek klere aan waarin jy gemaklik sowel as professioneel voel, maak jou hare netjies en eet ’n goeie ontbyt voor jy jou rekenaar aanskakel om met jou dag se take te begin. Jy kan meer onproduktief voel as jy in jou nagklere werk of nie ’n normale roetine volg nie. Dit is dus baie belangrik dat jy die dag reg begin om meer produktief deur die dag te wees en sodoende te sorg dat jy aan die einde van die dag jou rekenaar met genoegdoening kan afskakel.
  5. Stel grense met jou skedule
    Woon jy saam met ’n huismaat, ’n lewensmaat of kinders?  Maak seker dat almal in die huishouding jou werksroetine verstaan en jou nie in werksure steur volgens jou spesifieke skedule wat jy opgestel het nie.  Kommunikasie is in dié geval uiters belangrik.  Baie van die ouers word nou ook verplig om onderwysers vir hulle kinders te wees, dus moet jy seker maak jy het ’n spesifieke tydgleuf waartydens jy jou onverdeelde aandag en toewyding aan skoolwerk kan gee. Dit sal die kinders ook help om ’n goeie roetine te handhaaf.
  6. Probeer om nie meer as een ding op ’n slag te doen nie
    Ons almal is geneig om te spog dat ons met meer as een ding op ’n slag besig is. Ter wille van produktiwiteit en akkuraatheid is dit egter nie so ʼn goeie idee nie.  Dit kan nog moeiliker wees om nie te probeer om vele take gelyktydig te doen as jy van die huis af werk nie. Wees dus versigtig om jou nie hieraan skuldig te maak nie.  Dit kan ʼn groot versoeking wees om gou ’n bondel wasgoed in die wasmasjien te sit terwyl jy werk, of gou skoon te maak en vloere te was, maar dit kan daartoe lei dat jou aandag van jou werk afgetrek word, wat teenproduktief kan wees.  Maak huistake deel van jou beplanning.
  7. Sit genoeg tyd opsy vir ’n blaaskans
    Staan gereeld op en strek jou bene, en gee jou oë ’n ruskans weg van die rekenaarskerm. Dit is belangrik om gereeld ʼn kort blaaskans te neem. Dit sal verseker dat jy oor die lang termyn meer produktief is.  ʼn Mens se brein moet ook ʼn ruskans kry van werk, en dit is uiters belangrik om te sorg dat jy ook vars lug inasem deur net ʼn bietjie buite te gaan staan.
  8. Gebruik jou etenstyd vir eie tyd
    Jou ingesteldheid wanneer jy van die huis af werk – hoe jy daaroor dink, en die belangrikste van alles, hoe jy dit bestuur – het ʼn groot invloed op die sukses wat jy daarmee sal behaal. Maak seker dat jy jou etenstyd aan jouself toewy. Doen byvoorbeeld bietjie oefening wat jy by die huis kan doen. As jy uit die huis mag gaan, gaan stap en kry vars lug, eet iets gesond of maak ’n oproep en gesels met iemand waarmee jy graag wil gesels, maar nooit tyd voor kry nie, of bestee die tyd saam met jou gesin.
  9. Maak seker jy is georganiseerd
    Sit vir jouself tye op jou kalender of in jou dagboek opsy wat jy aan spesifieke take gaan wy, waartydens jy geen vergaderings gaan bywoon nie, en net op jou doen-lysie gaan fokus.  Sit ook tyd in jou skedule opsy om seker te maak jy bestee ook tyd om jou e-posse deur te gaan en dit te beantwoord. Indien daar ’n e-pos is wat baie tyd in beslag gaan neem, ruim tyd daarvoor in op jou kalender sodat jy weet jy kan dan net aan daardie taak aandag gee. Dit sal jou ook help om by jou sperdatums te bly of nie te vergeet van ’n taak nie.
  10. Faseer jou werksdag uit aan die einde van die dag
    Begin om jou dag af te sluit deur seker te maak dat jy deur die moet-doen-lysie vir daardie dag gaan en afmerk wat jy afgehandel het. Ruim ook tyd in om ’n moet-doen-lysie vir die volgende dag op te stel om seker te maak dat jou gedagtes nie heeltyd op onafgehandelde werk gefokus is nie.  Dit sal ’n groot impak hê op hoe jy die res van die aand gaan rus en ’n goeie balans handhaaf.  Skakel ook jou rekenaar af en verlaat jou werkstasie.  As jy dit doen, sal jou brein ook vir jou sê dat jy klaar is met jou werksdag.
  11. Bestee genoegsame tyd saam met jou familie om die werksdag mooi af te sluit
    Doen lekker aktiwiteite saam met jou huismaat of lewensmaat om seker te maak jy skakel af van die dag se werk.  Doen iets wat almal geniet, hetsy dit is om te gaan stap, saam te oefen, saam ’n program op die TV te kyk, bordspeletjies te speel of om saam kos te maak en kosvoorbereidings te doen.

Daar is egter geen regte of verkeerde resep vir werk-lewe-balans nie, en sekere dinge werk vir sekere mense, maar nie vir almal nie. Die beste sal wees om met verskillende wenke te eksperimenteer en te kyk wat die beste vir jou werk.

Bronnelys:
https://productivityist.com/work-life-balance-home/
https://medium.com/insiden26/keeping-a-healthy-work-life-balance-while-working-from-home-9777a8ceeb20
https://www.glassdoor.com/blog/how-to-achieve-work-life-balance/

Ontwrigtende era midde-in ʼn ontwrigtende werklikheid

KURSUSSTATUS:

Deur Dr. Juran van den Heever

Grendelstaat dwing ons om die vierde nywerheidsrewolusie vinniger te begryp en te omhels

Voor die grendelstaat is ʼn groot bohaai opgeskop oor die vierde nywerheidsrewolusie, maar min mense het hulle werklik daaraan gesteur. Mense het voortgegaan asof hulle nog vir baie jare net so gaan bly werk as wat hulle die afgelope 30 jaar gewerk het. Die koronavirus en al die gevolge daarvan het mense, veral in die werkplek, heeltemal onkant betrap. Hierdie dokument gaan die twee ontwrigters vergelyk.

 

  1. Die koronavirus

Die koronavirus is sonder twyfel ʼn wêreldpandemie wat onbeheerbaar is en niemand, ongeag ras, klas of herkoms, ontsien nie. Hierdie pandemie stoomroller voort terwyl regerings grendelstate in desperate pogings instel om dit te probeer stuit. Die impak van die pandemie het die volgende gevolge vir hoe die mens met mekaar omgaan, werk en sake doen:

  • Die mens is afgesonder en geïsoleerd. Dit het die mens, wat ʼn sosiale wese is, heeltemal onkant betrap.
  • Mense vir wie dit moontlik is, is gedwing om ewe skielik aanlyn te werk. Sommige maatskappye het al voor die koronavirus personeel gedesentraliseerd laat werk en hulle het sonder enige probleme voortgegaan.  Ander mense moes vinnig nuwe tegnologie aanleer en hul eie maak.
  • Die mens het tydens die grendelstaat baie kreatief en innoverend begin raak. Ons het op sosiale media gesien hoe mense oefen, kosmaak, werk en ander take verrig.
  • Mense het maniere gevind om te funksioneer soos wat dit nog nooit tevore vir hulle nodig was om te funksioneer nie.
  • Gemeenskappe vorm op maniere wat ʼn mens nie gedink het moontlik is nie. Kerke het begin aanlyn uitsaai, gimnasiums en afrigters het met tegnologie soos Zoom begin klasgee en balletklasse word via Skype aangebied. Die lysie gaan net aan.
  • Daar heers steeds onsekerheid oor die toekoms van werk soos ons dit ken. Baie mense is bekommerd oor hul werk en inkomste.
  • Besighede verander hul bedryfsmodelle stelselmatig. Besighede besef dat hulle nou nuwe maniere moet vind om met kliënte kontak te maak, om aflewerings te doen en om aanlyn bestellings te neem.
  • Dit het ʼn geweldige internasionale effek.

 

  1. Die vierde nywerheidsrewolusie

Die vierde nywerheidsrewolusie word gekenmerk deur die internet van dinge wat onder meer robotika, kunsmatige intelligensie, digitalisering en 3D-drukwerk insluit. Daar word al ʼn paar jaar lank baie hieroor geskryf en gepraat, veral deur die Wêreld- Ekonomiese Forum, wat klem lê op hoe besighede die erns hiervan moet insien en die werknemer hom moet toerus met vaardighede om in hierdie tyd relevant te bly. Die vierde nywerheidsrewolusie gaan veral ʼn impak hê op hoe ons leef, werk en met mekaar omgaan.

Dit het ʼn geweldige impak op die ekonomie, besighede, op internasionale vlak, op gemeenskappe en op die individu. Die vierde nywerheidsrewolusie kom verander regerings, gesondheidsorg, onderrig en hoe ons handel dryf.

Die impak op besighede:

  • Sekere maatskappye, soos Uber en airbnb, gaan die mark vinniger domineer. Hulle word ontwrigters genoem. Die rede daarvoor is omdat sulke maatskappye die fisiese, biologiese en digitale komponente kombineer en nuwe produkte of dienste, of maniere van handeldryf in die mark stoot.
  • Kliënte se verwagtinge verander omdat hulle almal aanlyn en verbind is en op enige tyd en plek die beste produk of diens aanlyn kan bekom. Kliënte het baie mag en kan enige tyd ʼn organisasie se sukses, al dan nie, bepaal.
  • Besighede moet digitaal transformeer en besef dat data die nuwe geldeenheid vorm.
  • Daar gaan samewerkingsooreenkomste tussen verskillende maatskappye ontstaan waar die een oor sekere hulpbronne beskik en die ander maatskappy oor ander. Die een het basies die ander nodig om te oorleef.
  • Maatskappye gaan geld en tyd aan innovasie moet bestee om in dié era voor te bly.

Die impak op die werknemer:

  • Die werknemer moet besef dat digitalisering ʼn werklikheid is en dat sekere poste deur robotte oorgeneem kan word.
  • Die spoed, breedte en wydte van die transformasie van stelsels is groot en nuwe tegnologie gaan die aard van werk verander.
  • Daar heers nog onsekerheid oor hoe vinnig outomatisering poste gaan oorneem.
  • Die mens moet besef dat hy nog altyd aanpasbaar is, en met die nuwe tegnologie gaan daar ook nuwe poste kom.
  • Werknemers kan hul bestaande vaardighede kreatief gebruik en kombineer om in die nuwe tyd relevant te bly.
  • Tegnologie vernietig sekere beroepe, maar dit word deur nuwes vervang.
  • Die menslike wolk, oftewel “human cloud,” word in hierdie tyd ʼn werklikheid. Mense bied hul dienste aanlyn aan en word daar gegradeer en geresenseer. Die beste word dan vir die lewering van ʼn diens aangevra.
  • Mense gaan meer gedesentraliseerd werk en gaan fokus op hul spesialisveld wat hulle aanlyn aanbied.
  • Die mens gaan steeds wil voel dat hy deel is van iets groter; dat hy ʼn doel het wat hy kan nastreef. Mense is op soek na ʼn harmonieuse werk-lewe-integrasie. Hulle het die begeerte na ʼn betekenisvolle verbinding.

 

  1. Hoe bring ons die twee ontwrigters by mekaar uit?

Die koronavirus het definitief tot dusver ʼn enorme impak gemaak op hoe die mens werk, sake doen en met mekaar omgaan. Ons sien hoe mense moes skarrel om gedesentraliseerd te werk, hoe besighede planne moes maak om te oorleef en hoe mense op sosiale media uitgehonger was vir mekaar se aandag en ʼn gemeenskapsgevoel. Daar is amper elke dag ʼn “challenge” op Facebook of oefensessies op Zoom, kosmaak-episodes tussen vriende en grappe oor tuisonderrig.

So het besighede ook anders begin dink deur te fokus op hul sosiale verantwoordelikheid, omgee vir kliënte en empatie. Dit dui op ʼn gemeenskapsgevoel.

My gevolgtrekking is dat die koronavirus ons eintlik kom voorberei om nou die vierde nywerheidsrewolusie te begryp en te omhels. Elke individu moet hom of haar voorberei om in die nuwe aanlyn wêreld te funksioneer en produktief te wees. Indien moontlik, moet nuwe, kreatiewe en innoverende maniere gevind word om te werk. Daar moet baie vinnig aan nuwe vaardighede aandag gegee word. Die aanleer van nuwe vaardighede sal verseker dat individue op die voorpunt van werk bly. Besighede sal hul besigheidsmodelle moet aanpas.

Gemeenskappe bly belangrik en des te meer die individu binne die gemeenskap.  Gemeenskappe het gevorm deur aanlyn kerke, musiekvertonings en organisasies soos Solidariteit. Solidariteit het die gevoel van gemeenskap onderstreep en die individue het gevoel dat hulle midde-in die isolasie iewers behoort.

Nou, meer as ooit tevore, is dit tyd om op die volgende drie dinge te fokus:

  • Raak deel van die gemeenskap van Solidariteit. Gebruik en benut wat daar vir jou geskep is. Solidariteit het reeds die 4NR omhels en bied dienste soos die beroepsgildes, jou eie gemeenskap van mense wat dieselfde beroep as jy beoefen, loopbaanontwikkeling, werksgeleenthede, studiebeurse, en geleenthede vir studie en voortgesette leer.
  • Berei jou voor vir wat voorlê deur gebruik te maak van voortgesette leer. Bly só op die voorpunt van jou beroep. Die vermoë om vinniger as jou mededinger te leer, mag dalk jou enigste volhoubare, mededingende voordeel wees.
  • Pas jou besigheid aan en herorganiseer jou personeel daarvolgens. Bly ingelig oor wat in die wêreld van werk aangaan.

Ná hierdie pandemie gaan ons voortgaan om te werk, maar dit gaan anders lyk en dit sal goed wees as ons dit reeds nou kan omhels en ons eie maak.

Word ’n meester deur lewenslange leer!

KURSUSSTATUS:

Deur Dr. Juran van den Heever

Die meeste mense assosieer leer met formele onderwys of onderrig op skool, kollege of universiteit. Ons word almal van kleins af vertel dat ons goeie onderrig of opleiding moet kry om suksesvol te kan wees. Oor die algemeen is dit so dat formele opleiding en die daaruit voortvloeiende kwalifikasies belangrik is. Onderrig en opleiding kan ons potensiaal verbreed om beter en meer bevredigende werk te vind, meer te verdien en miskien meer suksesvol in ons gekose loopbaan te wees.

Onderrig of onderwys is egter slegs een soort “leer”. Daar is baie ander geleenthede om jou kennis te verbreed en die vaardighede te ontwikkel wat jy benodig.

Kennis en vaardighede kan aangeleer en ontwikkel word. Leer is onvermydelik en gebeur gedurig. Lewenslange leer gaan egter oor die skep en handhawing van ’n positiewe houding ten opsigte van leer vir persoonlike en professionele ontwikkeling.

Lewenslange leerders is gemotiveerd om te leer en te ontwikkel omdat hulle wil. Dit is ’n doelbewuste en vrywillige daad. Lewenslange leer kan ons begrip van die wêreld om ons verhoog, ons meer en beter geleenthede bied en ons lewensgehalte verbeter.

Ons leer hoofsaaklik om persoonlik en professioneel te ontwikkel, of om net onsself te verryk.

  1. Leer vir persoonlike ontwikkeling

Daar hoef nie ’n spesifieke rede vir leer te wees nie, aangesien leer ter wille van leer opsigself ’n lonende ervaring kan wees. Daar is natuurlik baie redes waarom mense leer vir persoonlike ontwikkeling. Jy wil dalk jou kennis of vaardighede verhoog of verbeter rondom ’n spesifieke aspek. Miskien wil jy ’n heel nuwe vaardigheid ontwikkel wat jou lewe op een of ander manier sal verbeter.

  1. Leer vir professionele ontwikkeling

Om goed opgelei te wees is nie noodwendig die sleutel tot indiensneming nie.

Alhoewel kwalifikasies vir jou ’n onderhoud kan kry, kan dit baie meer as dit verg om die werk te kry. Werkgewers is op soek na ’n goed gebalanseerde werknemer met oordraagbare vaardighede. Dit behels die vermoë om te kan demonstreer dat jy gretig is om te leer en te ontwikkel.

Benut geleenthede vir opleiding, afrigting of mentorskap terwyl jy werksaam is, en werk aan jou voortgesette professionele ontwikkeling, aangesien jy waarskynlik beter gaan word in dit wat jy doen. Iets wat jou huidige of toekomstige werkgewer nie gaan kan vermy nie.

As jy kies om meer te leer oor moontlike ander rigtings of vaardighede stel dit jou in staat om te spesialiseer en moontlik meer te verdien of na ’n ander bedryf of spesialiswêreld te beweeg. Op sy beurt gee dít ons ook meer ervaring om ons kennis en vaardighede te verbreed.

Vanuit ’n finansiële oogpunt is ’n meer bekwame en kundige werker ’n aanwins vir enige onderneming en kan dit lei tot vinniger bevordering met gepaardgaande salarisverhogings. Iemand wat meer kundig is, sal meer waarde hê, nie net vir werkgewers nie, maar ook vir kliënte. Kundigheid is ook dikwels ’n belangrike eienskap van ’n effektiewe leier.

In sy boek, Master it faster gebruik Colin Rose die akroniem “MASTER” om die ses fases te beskryf wat volgens hom die sleutel tot die effektiewe leerder is. Hierdie fases kan toegepas word op enige vorm van leer.

Meester (“Master”) jou leer:

  1. “Motivation” (motivering)
  2. “Acquire” (verwerf)
  3. “Search” (soek)
  4. “Trigger” (gee aanleiding tot)
  5. “Examine” (toets)
  6. “Reflect” (reflekteer)

 

Motivering

Lewenslange leer vereis self-motivering. Jy moet positief voel oor leer en oor jou vermoë om te leer en besef dat dit tot voordeel van jouself is.

Verwerf

Effektiewe leer vereis dat jy inligting inwin deur te lees, luister, waar te neem, te oefen, eksperimenteer en ervaar. Inligting is oral om ons. Die kuns is om relevante en betekenisvolle inligting te bekom en dit tot kennis en vaardighede te ontwikkel.

Soek

Leer is suksesvol sodra ons na afloop van die verkryging van persoonlike inligting  na ’n persoonlike betekenis kan soek. Ons vind dit moeilik om feite te onthou sonder om dit te verstaan ​​of dit in konteks te kan plaas.

Gee aanleiding tot

Mense is gewoonlik sleg wanneer dit kom by die onthou van inligting. Jy kan nie en sal nie alles onthou wat jy lees, hoor en ervaar nie. Jy kan help om herinneringe op verskillende maniere aan te wakker. Jy kan byvoorbeeld aantekeninge neem, oefen, bespreek en eksperimenteer met nuwe idees en vaardighede om jou te help leer en ontwikkel.

Toets

Jy moet die kennis wat jy opgedoen het gereeld ondersoek en altyd probeer om ’n oopkop te hou, jou begrip te bevraagteken en oop te wees vir nuwe inligting.

Om met ander te praat en hul standpunte in te sien kan ’n kragtige manier wees om jou eie persepsie en begrip van ’n onderwerp te ondersoek.

Reflekteer

Laastens moet jy nadink oor jou leer. Dink na oor hoe en waarom jy geleer het, insluitend hoe jy oor ’n spesifieke onderwerp of situasie gevoel het, voor en nadat jy jou kennis ontwikkel het.

Leer uit jou foute sowel as uit jou suksesse en probeer altyd om positief te bly.  Word die meester op jou gebied!

Skakel vandag nog in by jou Solidariteit Beroepsgilde:  www.gildes.solidariteit.co.za

Leer vandag nog jou toekoms oop by S-leer:  www.s-leer.co.za

Operateur 4.0 in die fabriek van die toekoms

KURSUSSTATUS:

Deur Dr. Juran van den Heever

Met die konstante innovering van kuber-fisiese sisteme, die internet van dinge, robotika, massa-data en die vergrote realiteit, sal produksiestelsels ook moet aanpas. Om die werk in hierdie nuwe fabrieke van die toekoms te verrig, het jy Operateurs 4.0 nodig. Operateur 4.0 is ʼn slim en vaardige operateur wat nie net saam met die robotte werk nie, maar ook werk doen wat deur masjiene gesteun word soos dit benodig word. Laasgenoemde gebeur deur middel van menslike kuber-fisiese sisteme, gevorderde tegnologie met mens-masjien-interaksie, en die aanpassingsvermoë van outomatisering saam met die mens.

Wêreldwyd, in lande soos Amerika, Suid-Korea en Duitsland, word reeds fabrieke van die toekoms opgerig (slim fabrieke). Hierdie fabrieke poog om die industriële werksmag en die werksomgewing tot 2025 grootliks te transformeer. Dit sal ʼn groot impak hê op die wêreld van werk, want Industrie 4.0 sal ontwerpe, vervaardiging, werksaamhede, die lewering van produkte en dienste en produksiesisteme transformeer.

Om dít te midde van die immigrasie van laag geskoolde werkers, verskillende opvoedingsvlakke onder werkers, vaardigheidsverskille en die demografie wat verskil, gedoen te kry, sal slim fabrieke die volgende elemente moet verbind en verweef:

  1. Slim produkte
  2. Slim masjiene
  3. Slim operateurs

Deur die drie te verbind of te verweef, sal dit produksiesisteme soepel, rats, opspoorbaar en aanpasbaar maak.

Om hierdie Industrie 4.0 aan te neem, sal vervaardigingsondernemings hierdie tegnologiese transformasie in samewerking met opleiding- en ontwikkelingsprogramme vir die werksmag moet aanbied, asook nuwe gereedskap en tegnologieë wat vaardige werkers gebruik en waarby die operateurs eerstehands betrokke is.

Nuwe werksomgewings soos die kuber-fisiese fabriek wat interaksie tussen man en masjien sal weerspieël, maar ook tussen digitale en die fisiese wêreld, sal oor sosio-tegnologiese transformasie van die fabriek van die toekoms en nuwe ontwerpdenke en inginieurfilosofieë moet beskik.

Die visie van Operateur 4.0 sal daarop toegespits wees om vertroue en interaksie tussen man en masjien te vestig, wat dit vir slim fabrieke moontlik sal maak om nie net die meeste uit slim masjiene se sterkpunte en vermoëns te kry nie, maar ook om slim operateurs te bemagtig met nuwe vaardighede en hulpmiddels.

ʼn Volhoubare fabriek in die vierde nywerheidsrewolusie sal ʼn werkplek wees waar sisteme, ontwerp en ingenieurswese saam met robotika, kinematika, kontrolesisteme, manipulasie, navigasie en aanpasbare outomatisasie stelsels werk om die kennis en vermoëns van die operateurs te verbeter.

Die rewolusie van die take van operateurs in die vervaardigingsektor lyk soos volg:

Operateur 4.0 sal bygestaan word deur masjiene en robotte, en die fisiese mens-kuber-sisteme.

 

Bronne:

Rupert, T., Jasko, S., Holczinger, T., & Abonyi, J. 2018. Enabling Tecgnologies for Operator 4.0.  Applied Sciences. (8) 1650.1-19

Romero, d. Stahre, J., Wuest, T., Noran, O., Bernus, P., Berglund, A. & Gorecky, D.  Towards an operator 4.0 typology:  A Human-Centric perspective on the Foruth Industrial Revolution Technologies.  Leer hier Besoek op 26 Feb. 2020.

Die wêreld van werk verander: Hier’s ons oplossing!

KURSUSSTATUS:

Jim Clifton die voorsitter van Gallup voer in sy boek, The Coming Jobs War, aan dat daar die uitdaging in die wêreld is om goeie werk te skep en entrepreneurskap te bevorder. Almal in die wêreld is op soek na ’n goeie werk. Goeie werk definieer ons, dit skep voortvarendheid en voorspoed. Hy voer aan dat ’n wêreldwye oorlog na goeie werk op pad is en dat daar nie tyd is om te mors nie.

’n Studie wat die Wêreld- Ekonomiese Forum (WEF) onder leiding van Charles Schwab onder duisende besigheidsleiers gedoen het, en wat in sy boek, The Fourth Industrial Revolution vervat is, is daar bevind dat die mens, te midde van die Vierde Nywerheidsrevolusie (4NR), deel wil wees van iets groter as hulleself en voel dat hulle ’n doel in die lewe het. Die Vierde Nywerheidsrevolusie gaan gepaard met die Internet van Dinge, tegnologiese vooruitgang, robotika en om bestaande vaardighede met tegnologie te verweef.

Die mens is verbind, maar tog alleen en binne die warboel van tegnologie moet mens relevant en verbind bly met die regte mense. Hoe doen ’n mens dit?

Die Solidariteit Beroepsgildes bied juis dít. ’n Netwerk van werk waarbinne mense in dieselfde beroepe ’n netwerk vorm. ’n Solidariteit Beroepsgilde is ’n gemeenskap wat jou nie net versterk in jou beroep nie, maar dit is ’n gemeenskap waar jy tuis voel, saam werk en saam leer. Dit is ’n gemeenskap wat hom daarop toespits om die beroep te beskerm, vir jongmense loopbaangeleenthede te skep, as waghond toesig te hou oor die beroep én met werkbare oplossings vir uitdagings vorendag te kom.

Die Beroepsgildes neem die tradisionele waardes naamlik kwaliteit, behoud, gemeenskapsgevoel en trots ter harte sodat elkeen die geleentheid het om hulself op hul loopbaanpad na meesterskap onmisbaar en uitnemend te maak. Gemeenskaplike waardes bied aan elke gildelid iets om in te glo, asook ’n platform om terug te ploeg en kennis te deel deur netwerkgeleenthede, werkskepping of mentorskap. As ’n Solidariteit-lid het jy outomaties toegang tot ’n beroepsgilde wat weer vir jou toegang gee tot bykomende voordele uniek aan dié spesifieke beroepsgilde wat op jou beroep van toepassing is.

Die sewe pilare van Solidariteit Beroepsgildes

  1. Plasings – Deur ons aanlyn portaal help ons jou nie net om werk te kry nie, maar ons help ook jongmense om ʼn beroep te kan betree.
  2. Netwerk – Gildes bied geleenthede vir jou om saam met ander in jou beroep te kan netwerk en kennis te deel.
  3. Mentorskap – Deur mentorskap bied ons ʼn morele rugsteun aan ons jongmense en kan jy leer van meesters in jou beroepsveld.
  4. Internskap – Gildes help jongmense om toegang te bekom tot internskappe in hul betrokke beroepsveld.
  5. Opleiding – Deur S-leer kan lede hul persoonlike ontwikkeling en kennis uitbrei, en is daar ook geleentheid om by Akademia kwaliteit kwalifikasies te bekom.
  6. Inligting – Kennis is mag, dus deel ons graag relevante inligting.
  7. Waghond – Ons beskerm jou in jou beroep, en staan op vir kwessies wat die sekuriteit, regverdigheid en kwaliteit van jou beroep mag beïnvloed.

Elke individu binne die gilde kan sy of haar eie loopbaanpad bepaal en relevant in sy of haar professie bly. Hoe sal dit werk?

‘n Groot komponent wat die Solidariteit se Beroepsgildes ondersteun is voortgesette leer deur die maatskappy S-leer, wat elke lid bemagtig om relevant in sy of haar beroep te bly, en ’n goeie werk te kry en dit te behou.

Die vermoë om vinniger as jou mededinger te leer mag dalk jou enigste volhoubare, kompeterende voordeel wees.

’n Kwalifikasie is steeds ’n gesogte kommoditeit en dit sal in die toekoms so bly, maar dit gaan moontlik in die arbeidsmark van die toekoms nie meer die alfa en die omega wees nie. Die wêreld se voorste tegnologie entrepreneur, Elon Musk, het verklaar dat grade nie ’n voorvereiste is om groot hoogtes te bereik nie. Hy sê die belangrikste is ontwikkeling en instandhouding van relevante vaardighede. Omdat grade in tegniese dissiplines vinnig uitgedien raak as gevolg van die vinnig ontwikkelende aard van dié sektor is lewenslange leer van kritieke belang.

Die aard van werk is besig om te verander. Hoewel mense steeds skeppend, sosiaal, mobiel en fisiek handvaardig is, moet hierdie menslike eienskappe, wat nooit gaan verdwyn nie, verweef word met nuwe tegnologie. Daar is net een antwoord op lewenslange verandering en dit is lewenslange leer.

Lewenslange leer is gebou op vier pilare, naamlik: Basiese onderrig, Hoëronderrig, Voortgesette opleiding en Heropleiding. S-leer fokus op die laaste twee pilare en sluit in beroepspesifieke opleiding, heropleiding en voortgesette opleiding. S-leer bemagtig lede met ekstra vaardighede wat jou onmisbaar in jou beroep sal maak.  Kursusse sluit onder andere in: Rekenaarvaardighede in Microsoft Excel en Word, Sagte vaardighede soos probleemoplossing en konflikbestuur, Beroepspesifieke vaardighede soos Verpleegsteropleiding, Kommunikasie, Bestuursvaardighede en vele meer. Dit sluit ook in ander relevante kursusse soos Skryfvaardighede,  Finansiële kennis, Leierskap, Projekbestuur en selfs ’n derde taal. Dit is maklik, modern en relevant.

S-leer maak gebruik van moderne leermetodes wat webinare en e-leer-kursusse insluit. Die gemengde leer model is ook uniek en gee die lewenslange leerder die geleentheid om kennis in te win deur interessante nuwe maniere van leer.

Voordele van lewenslange leer sluit in:

  1. Jy bly relevant
  2. Jy berei jouself voor vir die onverwagse
  3. Dit verhoog jou profiel
  4. Bevoegdheid lei tot vertroue
  5. Dit maak jou ontvanklik vir nuwe idees
  6. Dit verander jou perspektief
  7. Jy kan voordeel trek in die toekoms

Lede van Solidariteit Beroepsgildes kry tot en met 40%-afslag vir alle leerprogramme wat deur S-leer aangebied word en waar deur jy jou toekoms oop kan leer.

Raak vandag nog betrokke by jou beroepsgilde en ontvang voortgesette leer aangebied deur S-leer.