Deur Paulize Mahon

Ons almal weet hoe frustrerend dit is om met swak kliëntediens gekonfronteer te word, hetsy dit nou by jou gunstelingwinkel is waar jy elke naweek jou maand se salaris bestee op daai mooi swart en rooi rok wat so lank vir jou loer, of daai nuwe jagmes wat elke man net móét hê, en of jy vir ure in ʼn tou staan omdat jou bestuurderslisensie wat die week verval, hernu moet word. Jy sukkel om te verstaan hoe lank so ʼn proses dan nou regtig neem…

Ons word daagliks met een of ander vorm van kliëntediens gekonfronteer.  Maar het jy jouself al ooit afgevra of jy nie dalk self skuldig is en iemand anders briesend maak deur swak kliëntediens te verskaf nie?

Dit is belangrik om te verstaan dat kliëntediens die beginpunt is van hoe die publiek na die maatskappy kyk, hoe hulle oor die maatskappy voel, oor die maatskappy praat, en hoe persoonlike ervarings ten opsigte van diens so maklik op sosiale media gedeel word, hetsy dit positief of negatief is.

Verder moet jy onthou dat dit nie saak maak watter posisie jy beklee nie.  Jy is elke dag besig met ʼn tipe kliëntediens aan interne of eksterne kliënte. Jy lewer elke dag ʼn diens deur jou werk te doen.

Wat gebeur elke keer as jy goeie diens lewer?

  • Elke keer wat jy goeie diens aan iemand lewer, is jy besig om vertroue met die individu te bou wat van kardinale belang vir die maatskappy is, en jy moet seker maak dat die persoon weer van jou diens gebruik sal maak.
  • Die kwaliteit diens wat jy lewer, beteken meer as die prys wat jy betaal vir die produk, dus is mense geneig om terug te keer na maatskappye toe waar hulle ʼn positiewe ervaring gehad het, en hulle sal makliker iemand na die maatskappy verwys.
  • Die gevolg van bogenoemde is dat die maatskappy se handelsmerk besig is om bewustheid te ontwikkel en goeie bemarking teweegbring. Ons weet hoeveel bemarking mens uit die sak kan jaag. Hoekom dit nie eerder deur goeie kliëntediens bewerkstellig nie?
  • Goeie kliëntediens kan ook die hoeveelheid probleme in die maatskappy verminder en dit beteken dat werknemers minder klagtes het wat daagliks hanteer moet word, wat weer tot gevolg het dat minder personeel as gevolg van onaangename werksomstandighede bedank.

So, dink jy dat jou kliëntediens uitnemend is, of dink jy daar is ruimte vir verbetering?  Besoek www.s-leer.co.za en skryf in vir S-leer se kursus oor kliëntediensuitnemendheid en maak seker dat jy die nodige vaardighede het om uitstekende diens tot voordeel van jou maatskappy of organisasie te lewer!